Furvlenn hwilans

Jueces 10

Tola, Yaír ome israelitaarã poro waibɨarã pada

1Abimélec piuda tꞌẽepai Isacardeepa uchiada tꞌɨ̃jarapatapꞌedaa Tolapa israelitaarã kꞌaripaji. Mãgɨ́ Dodó ãichakꞌe paji; Fúa warra. Tola bapachi Samir pꞌuurude, Efraindeepa uchiadapꞌedaarã eujãdepema ee jẽra bɨmãi. 2Veintitrés año wãyaarude Tola israelitaarã poro waibɨa paji. Jai–idaakꞌãri, Samirde ɨajida.

3Ma tꞌẽepai veintidós año wãyaarude Galaad eujãdepema tꞌɨ̃jarapatapꞌedaa Yaír israelitaarã poro waibɨa paji. 4Jairpa warrarã treinta iru baji. Ma chaachaa burro batau kꞌawaa pꞌanajida mãikꞌaapa ma Galaad eujãde pꞌuuru ãchi jua ekꞌari iru pꞌanajida. Maperã ma pꞌuuru treinta “Yaír pꞌuuru” apata.

5Yaír jai–idaakꞌãri, Camonde ɨajida.

Israelitaarã Amón pidaarã jua ekꞌari pꞌanadapꞌedaa

6Mamĩda israelitaarãpa waya ne–inaa kꞌachia oo pꞌaneejida Tachi Akꞌõre kꞌĩrapite. Ɨtꞌaa tꞌɨ̃pachida akꞌõre waibɨa apatapꞌedaa Baalmaa, Astartemaa mãikꞌaapa nãgɨ́ eujãdepemaarã akꞌõre waibɨa apatapꞌedaamaa: Siria, Sidón, Moab, Amón, filisteorã akꞌõre waibɨa apatapꞌedaamaa paara. Tachi Akꞌõrede ijãa amaajida mãikꞌaapa irumaa ɨtꞌaa tꞌɨ̃ amaajida. 7Maperã Tachi Akꞌõre ãra ome kꞌĩraudachi mãikꞌaapa ãra pꞌoyaapiji filisteorãmaa, Amón pidaarãmaa. 8Maadakꞌãriipa dieciocho año wãyaarude filisteorãpa Amón pidaarã ome israelitaarã kꞌachia iru pꞌanapachida ãchi jua ekꞌari. Mãga iru pꞌanapachida chi Galaad eujãde pꞌanapatapꞌedaarã, Jordán to kꞌĩraikꞌa eerepema amorreorã eujãde pꞌanapatapꞌedaarã paara. 9Maapai ma Amón pidaarã Jordán to ichiaba sĩajida chõodaitꞌee Judadeepa uchiadapꞌedaarã ome, Benjamindeepa uchiadapꞌedaarã ome mãikꞌaapa Efraindeepa uchiadapꞌedaarã ome. Maperã israelitaarã chupɨria pꞌanajida. 10Mãga nɨde Tachi Akꞌõremaa chupɨria iidijida. Mãgajida: “Tachi Akꞌõre Waibɨa, taipa pɨ kꞌĩrapite kꞌachia oopatada ajida. Pɨde ijãa amaajida ɨtꞌaa tꞌɨ̃nadaitꞌee awaraa akꞌõre waibɨa apataarãmaa.”

11Mãpai Tachi Akꞌõrepa pꞌanauji: “Parã nãgɨ́ pꞌuuru pidaarã juade kꞌachia pꞌanapachida: Egipto pidaarã, amorreorã, Amón pidaarã, filisteorã, 12sidoniorã, amalecitaarã, Madián pidaarã juade paara. Mãgɨɨrã jua ekꞌari pꞌanadakꞌãri, mɨmaa chupɨria iidipachida. Mãpai mɨa parã kꞌaripapachi. 13Mamĩda parã mɨde ijãa amaajida waya ijãadaitꞌee awaraa akꞌõre waibɨa apatade. Maperã mɨa parã waa kꞌaripa kꞌinia–e bɨ. 14Iidinadapáde aji, pãchi akꞌõre waibɨa apata jɨrɨtꞌeradapꞌedaamaa. ¿Jãgɨɨrãpa parã kꞌaripadaitꞌee–ekꞌã?” aji.

15Mãpai israelitaarãpa Tachi Akꞌõremaa mãgajida: “Wãara taipa pꞌekꞌau kꞌachia oopata. Tai miapi kꞌinia bɨ pɨrã, miapipáde aji. ¡Mamĩda ɨ̃rá tai kꞌaripapáde!” ajida. 16Mãga jaradapꞌeda, ma akꞌõre waibɨa apata iru pꞌanadapꞌedaa ãrikꞌoojida waya ɨtꞌaa tꞌɨ̃pataadaitꞌee Tachi Akꞌõremaa. Mãga unukꞌãri, Tachi Akꞌõre waa pꞌoyaa choo–e paji ãra audú chupɨria chitoonadapꞌedaa perã.

17Maapai Amón pidaarã chipꞌedachida Galaad eujãde. Jõdee israelitaarã chipꞌedachida Mizpade. 18israelitaarã, chi Galaad eujãde pꞌanapatapꞌedaarãpa pedeeteejida Amón pidaarã pꞌoyaaru ãchi poro waibɨa papidaitꞌee.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index