Furvlenn hwilans

Éxodo 9

Tachi Akꞌõrepa Egiptodepema ne–animalaarã kꞌayaapida

1Maapꞌeda Tachi Akꞌõrepa Moisemaa mãgaji:

—Faraonmaa wã́ji mãikꞌaapa nãga jaráji: “Tachi Akꞌõre, hebreorã Akꞌõre Waibɨapa nãga jara bɨ: ‘Mɨ eperãarã pëipáde a bɨ, mɨmaa ɨtꞌaa tꞌɨ̃nadamerã.’ 2Irua jara bɨkꞌa oo kꞌinia–e bɨ pɨrã mãikꞌaapa iru eperãarã atꞌãri pëi–e pɨrã, 3ichi juapa parã Egipto pidaarã ne–animalaarã pꞌuurudeepa taawa pꞌanɨɨrãmaa kꞌayaa kꞌachia baripiitꞌee. Piudayada a bɨ, caballoorã, burroorã, camelloorã, pꞌakꞌaarã, ovejaarã mãikꞌaapa chivoorã. 4Mamĩda tai Akꞌõre Waibɨapa israelitaarã pia akꞌɨitꞌeeda a bɨ, mãikꞌaapa ãra ne–animalaarã pia akꞌɨitꞌeeda a bɨ, apida piunaadamerã.” 5Ichiaba Tachi Akꞌõrepa mãgaji:

—Nuta mãga ooitꞌeeda aji.

6Aɨ norema Tachi Akꞌõrepa ooji ichia jaradakꞌa. Egiptodepemaarã pꞌakꞌaarã jõmaweda kꞌiniijida. Mamĩda israelitaarã pꞌakꞌaarã apida piuda–e paji. 7Faraonpa ichi mimiapataarã pëiji israelitaarã pꞌanapatapꞌedaamaa ãra ne–animalaarã akꞌɨde. Mamĩda apida piu unuda–e paji. Faraonpa mãga kꞌawaji mĩda, kꞌɨɨrɨ kꞌisua beeji mãikꞌaapa israelitaarã pëi–e paji.

Tachi Akꞌõrepa Egipto pidaarã aidapa kꞌayaapida

8Mãpai Tachi Akꞌõrepa Moisemaa mãikꞌaapa Aaronmaa mãgaji:

—Chokꞌo paapatamãi wãdapꞌeda, itꞌabarre pꞌora juapa tꞌoi atátɨ mãikꞌaapa Moisepa ma itꞌabarre pꞌora ɨtꞌaa pꞌóji Faraón kꞌĩrapite. 9Ma itꞌabarre pꞌora kꞌaurepa Egipto eujã jõmaade aida paraaitꞌee. Eperãarã kꞌapꞌɨade, ne–animalaarã kꞌapꞌɨade paara bariitꞌeeda aji.

10Mapa Moisés, Aarón ome itꞌabarre pꞌora tꞌoi atadapꞌeda, Faraonmaa wãjida. Mama iru kꞌĩrapite Moisepa ma itꞌabarre pꞌora ɨtꞌaa pꞌokꞌãri, eperãarã, ne–animalaarã paara aida–idaakꞌoodachida. 11Petau tau kꞌawaa beerã pꞌoyaa Moisés kꞌĩrapite wãda–e paji, ãchi, apemaarã Egipto pidaarãkꞌa aida–idaa pꞌanadapꞌedaa perã. 12Moisepa mãga ooji mĩda, Tachi Akꞌõrepa Faraón kꞌɨɨrɨ kꞌisuapiji Moisés pedee Aarón pedee ome ũriamaa bamerã, Tachi Akꞌõrepa naaweda jaradakꞌa.

Tachi Akꞌõrepa pajãdeepa hielo kꞌoi taukꞌa baaipida

13Mãpai Tachi Akꞌõrepa Moisemaa mãgaji:

—Tapꞌedaweda wã́ji Faraonmaa mãikꞌaapa nãga jaráji. “Tachi Akꞌõre, hebreorã Akꞌõre Waibɨapa nãga jara bɨ: ‘Mɨ eperãarã pëipáde a bɨ, mɨmaa ɨtꞌaa tꞌɨ̃nadamerã. 14Mãga–e pɨrã, mɨa ne–inaa kꞌachiara ooitꞌee pɨmaa, poro waibɨarã pɨ jua ekꞌari beerãmaa mãikꞌaapa pɨ eperãarãmaa. Mãgá kꞌawaadaitꞌee awaraa Akꞌõre Waibɨa mɨkꞌa wẽ–e. 15Naaweda mɨchi juapa parãmaa kꞌayaa audú kꞌachia baripikꞌaji mãikꞌaapa parã jõmaweda jõpikꞌaji. 16Mamĩda mãga oo–e paji. Pɨ, pɨchi aukꞌaarã atꞌãri chokꞌai pꞌanɨ mɨa parã kꞌapꞌɨa pari na pꞌekꞌau eujãdepemaarã jõmaarãmaa akꞌɨpi kꞌinia bairã Mɨta Tachi Akꞌõre. 17Mamĩda pɨ audua bairã, mɨ eperãarã wãpiamaa bɨ. 18Maperã nu parã eujãde audú hielo kꞌoi taukꞌa baaipiitꞌeeda a bɨ. Eperãarã Egipto eujãde pꞌaneedakꞌãriipa waide mãpemaarãpa mãga unudakꞌaa. 19Mapa parã ne–animalaarã atꞌãri chokꞌai pꞌanɨɨrã jɨ̃apítɨ te ekꞌari mãikꞌaapa eperãarã teeda pꞌaneepítɨ. Taawa pꞌaneeruta pɨrã, ma hielo kꞌoi taukꞌa baairupa piudayada’ ” a bɨ.

20Mãga ũridakꞌãri, poro waibɨarã Faraón jua ekꞌari beerã ũkꞌuru pꞌerajida mãikꞌaapa ãchi esclavoorã teedaa tꞌĩupijida mãikꞌaapa ne–animalaarã te ekꞌari tꞌĩupijida. 21Mamĩda awaraarãpa ijãada–e paji. Maperã ãchi ne–animalaarã ichiakꞌau taawa bëijida.

22Mãpai Tachi Akꞌõrepa Moisemaa mãgaji:

—Pɨ jua ɨtꞌaa ɨapáde aji, Egipto eujã jõmaade hielo kꞌoi taukꞌa baaimerã eperãarã ɨ̃rɨ, ne–animalaarã ɨ̃rɨ, ne–inaa kꞌarra ɨ̃rɨ paara.

23Mãpai Moisepa ooji Tachi Akꞌõrepa jaradakꞌa. Ichi pakꞌuru anipapariida ɨtꞌaa ɨakꞌãri, hielo kꞌoi taukꞌa baaiji Egipto eujã jõmaade. Ichiaba pa tau pꞌorepꞌorepari nɨ̃beeji. 24Ma hielo audú golpe baaiji mãikꞌaapa audú pa baai nɨ̃baji. Egipto pidaarã ãchobeedachida, waide mãga unudakꞌaa pada perã. 25Ma hielo baaiji eperãarã ɨ̃rɨ mãikꞌaapa ne–animalaarã ɨ̃rɨ. Ma awara ma hielopa ne–inaa kꞌarra jõpiji mãikꞌaapa pakꞌuru ãrikꞌooji. 26Mamĩda Gosén eujãde israelitaarã pꞌanadapꞌedaamãi, hielo tau apida baai–e paji.

27Mãpai Faraonpa jara pëiji Moisés, Aarón ome chedamerã. Ichi kꞌĩrapite pachedakꞌãri, mãgaji:

—Mɨ kꞌaurépata nãga nɨ̃bɨda aji. Parã Akꞌõre Waibɨa kꞌaurepa–e. Mɨa mɨchi aukꞌaarã ome israelitaarãmaa kꞌachia oojida. 28Ɨtꞌaa iidítɨ parã Akꞌõre Waibɨamaa na hielo tau, pa jĩwaa nɨ̃bɨ ome wẽpapimerã. Irua mãga ooru pɨrã, mɨa parã pëiyada aji.

29Moisepa pꞌanauji:

—Pꞌuurudeepa uchiakꞌãri, mɨ jua ɨtꞌaa ɨaitꞌee mãikꞌaapa ɨtꞌaa iidiitꞌee Tachi Akꞌõremaa, na hielo waa baaipinaamerã mãikꞌaapa waa pa tꞌopinaamerã. Mãgá parãpa kꞌawaadai na eujã Tachi Akꞌõredé. 30Mamĩda mɨa kꞌawa bɨ pɨa, poro waibɨarã pɨ jua ekꞌari beerã ome waide wãara tai Akꞌõre Waibɨa waaweeda–e pꞌanɨ.

31(Lino kꞌarra uuda jõmaweda jõji, chi pꞌono ãridapꞌedaa perã mãikꞌaapa cebada tau uuda ãrikꞌoodachi, chi kꞌɨmɨ chakꞌeerã jõma jurrukꞌoodapꞌedaa perã ma hielo baaidapa. 32Mamĩda trigo tau uuda mãikꞌaapa centeno tau uuda atꞌãri pia baji, tꞌẽepai chi pꞌono tꞌonodaitꞌee pada perã.)

33Faraón ome pedee bapꞌeda, Moisés pꞌuurudeepa taawaa uchiaji. Mama ichi jua ɨtꞌaa ɨakꞌãri Tachi Akꞌõre kꞌĩrapite, ma hielo kꞌoi taukꞌa baai nɨ̃bada, kꞌoi paara wẽpadachi mãikꞌaapa waa pa tꞌo–e paji. 34Mamĩda Faraonpa unukꞌãri waa hielo kꞌoi ome baai–e bɨ mãikꞌaapa waa pa jĩwaa–e bɨ, waya tꞌãri kꞌachiadachi, poro waibɨarã ichi jua ekꞌari beerã paara. 35Israelitaarã atꞌãri pëi–e paji, kꞌɨɨrɨ kꞌisua bada perã Tachi Akꞌõrepa naaweda jaradakꞌa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index