Furvlenn hwilans

LEVÍTICO 8

Aarontapish, paipac churicunatapish Diospac

cachun chicanyachishcamanta

(Ex 29.1-37)

1Mandac Dios Moisesta rimashpaca: 2«Aarontapish, paipac churicunatapish pushamui. Shinallatac curacunapac churanatapish, cahuina aceitetapish, becitapish, ishcai cari ovejatapish, uchilla taza levadura illac tandatapish apamui. 3Chaimantaca tucui israelcunata ñucahuan tupana huasi pungupi tandachi» nirca.

4Moisesca Mandac Dios mandashca shinallatacmi israelcunataca Dios-huan tupana huasi pungupi tandachirca. 5Chaipimi Moisesca israelcunataca: «Mandac Diosca caitami ruhuachun nin» nirca.

6Chai quipami Moisesca Aarontapish, paipac churicunatapish cayashpa, yacuhuan armachishpa, 7curacunapac churanata churachishpa chumbillichirca. Chashnallatac ucuta tunicata, jahuataca efodta churachishpami, efod huatullahuantac huatachirca. 8Chai quipaca pectoralta churachishpami, jahuapica Urimta, Tumimta churachirca. 9Cutin umapica mitrata churachishpami, ñaupamanca Diospaclla cashcata ricuchishpa, curi latapi quillcashpa churarca. Moisesca Mandac Dios mandashca shinallatacmi ruhuarca.

10Moisesca Dios-huan tupana huasitapish, chaipi tiyaccunatapish aceitehuan cahuishpami Diospacllata ruhuarca. 11Chai aceitellahuantacmi altar jahuapi canchis cutin chiraparca. Altarpi tiyaccunatapish, jatun pailatapish, pailata tiyachinatapish aceitehuan cahuishpami Diospacllata ruhuarca. 12Moisesca Aaronpac umapi aceiteta tallishpami, Diospaclla curata ruhuarca. 13Moisesca Mandac Dios nishca shinallatacmi Aaronpac churicunata cayashpa, curapac churanata churachishpa, chumbillichishpa, umapica mitrata churachirca.

14Moisesca juchata pichana becita apamuchunmi mandarca. Chai becipac umapi Aaronpish, paipac churicunapish maquita churacpimi, 15Moisesca chai becita huañuchishpa, yahuarpi dedota satishpa, Diosman cushpa rupachina altar gachucunapi cahuishpa, Diospacllata ruhuarca. Puchu yahuartaca altar chaquipimi tallirca. Shina tallicpimi, chai altarca Dios-huan alli tucungapac rupachina altar saquirirca.

16Moisesca animalpac chunzhulli tapashca huiratapish, yana shungu huiratapish, riñón huiratapish llucchishpami altarpi rupachirca. 17Mandac Dios nishca shinallatacmi beci caratapish, aichatapish, huanutapish carpa huasimanta canzhaman apashpa rupachirca.

18Quipaca tucui huañuchina cari ovejatami apamuchun mandarca. Chai animalpac umapimi Aaronpish, paipac churicunapish maquita churarca. 19Chashna churacpimi, Moisesca chai ovejata huañuchishpa, yahuartaca altar jahua muyundipi chiraparca. 20Moisesca huañuchishpa, pitinacushpami huirandi, umandi rupachirca. 21Chunzhullitapish, changacunatapish yacuhuan jahuashpami tucuita rupachirca. Moisesca Mandac Dios mandashca shinallatacmi paiman mishquilla ashnachun, tucui rupachirca.

22Chaimantaca Diospacllata tucuna ovejatami apamuchun mandarca. Chai ovejapac uma jahuapimi Aaronpish, paipac churicunapish maquita churarca. 23Chai quipami Moisesca chai ovejata huañuchishpa, yahuarta japishpa, Aaronpac alli ringritapish, alli maqui mama dedotapish, alli chaqui mama dedotapish cahuirca. 24Shinallatac Moisesca Aaronpac churicunata cayachishpami paicunapac alli lado ringripipish, alli maqui mama dedopipish, alli chaqui mama dedopipish yahuarhuan cahuirca. Chai puchushca yahuartaca altar muyundipimi chiraparca.

25Chaimantaca chupatapish, chunzhulli tapashca huiratapish, yana shungu huiratapish, ishcai riñón tapashca huiratapish, alli lado changatapish japircami. 26Mandac Diospac ñaupapi tiyacuc tazamanta levadura illac tandatapish, aceitehuan ruhuashca shuc tortatapish, shuc galletatapish chai animalpac alli lado changa jahuapi, huira jahuapi churarca. 27Chashnami Aaronpac maquipipish, paipac churicunapac maquipipish churarca. Paicunami cuyuchishpa, Mandac Diosman curca. 28Quipaca paicunapac maquimanta japishpami, Moisesca Diosman cushpa, tucuita rupachina altarpi rupachirca. Chaicunami Aarontapish, paipac churicunatapish Diospaclla cachun chicanyachingapac rupachinaca carca. Chashna rupachicpimi, Diosmanca mishquillata ashnacuc chayarca.

29Moisesca pecho aichata japishpami, cuyuchishpa Diosman curca. Chaica cuyuchishpa cushca ofrendami carca. Mandac Dios mandashca shinami, Diospaclla tucungapac cushca oveja aichaca Moisés japina carca.

30Chai quipami Moisesca altarpi tiyac yahuartapish, cahuina aceitetapish japishpa Aaronpipish, paipac churicunapipish, paicunapac churanacunapipish chiraparca. Chashna ruhuacpimi, Aaronpish, churicunapish, churanacunapish Diospaclla saquirirca.

31Moisés Aarontapish, paipac churicunatapish rimashpaca: «Dios-huan tupana huasi yaicunapi aichata yanushpa, Diospaclla cachun chicanyachina tazapi cac tandahuan chaillapitac micuichic. Chaicunataca ñucami: “Aarón, paipac churicunahuanmi micunga” nishpa mandarcani. 32Chai puchushca aichatapish, tandatapish ninapi rupachinguichic. 33Dios-huan tupana huasi pungumantaca canchis punzhacaman ama llucshinguichicchu. Diospaclla chicanyana punzhaca canchis punzhacamanmi canga. 34Cunan ruhuashca shinallatac ruhuachunmi, Mandac Diosca cancunapac juchamanta cuchun mandarca. 35Dios-huan tupana huasi pungumantaca canchis punzhacaman ama anchuringuichicchu. Tutapish, punzhapish chaipi canguichic. Cancuna mana huañungapacca, cai mandashcacunatami pactachina canguichic. Mandac Diosca chashnami ñucataca mandarca» nirca.

36Aaronpish, paipac churicunapish Mandac Dios Moisesta mandashca shinallatacmi ruhuarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index