Furvlenn hwilans

SOERA ZINOENÕ 22

Sinoenõ 22.

I. Mangarõngarõ Dawido, ba wamakao andrõ chõnia; maedomaedo Mesia andrõ ia, nifakao dania. II. Isoeno Lowalangi, me no ifoeli itolo ia.

1Chõ doeka wanoenõ andrõ. Dali: ”Bõhõ si alawe, na moloeo.” Sinoenõ; chõ Dawido.

2I. He Lowalangigoe! He Lowalangigoe! Hana wa no õʼerogõ ndraʼo? No arõoe ndraʼoegõ, ba wangorifi jaʼo enaʼõ ba ba wamondrongo ligoe, fangarõngarõgoe andre. (Mat. 27, 46).

3He Lowalangigoe! Moeʼao ndraʼo, na maʼṍchõ, ba lõ õtema ligoe, ba ba zi bongi, ba lõ faloecha wondrara dõdõ.

4Ba niʼamoniʼõ sa atṍ ndraʼoegõ, sidadao jaw̃a wanoenõ Ndraono Gizeraëli andrõ.

5Chõoe manõtõna ndra toeama fõna, ladõnadõna, ba no õʼorifi ira.

6Jaʼoegõ laʼangarõfi li, ba lasõndra wangorifi; chõoe ladõnadõna, ba lõ si teʼailaisi ira. (Sin. 25, 2. 3).

7Ba jaʼodo, ba no koekoeõ ba tenga niha; famaʼiki niha ndraʼodo ba si lõ ba dõdõ zato! (Sin. 69, 8. Jes. 53, 3. Mat. 27, 39—44).

8Laʼoʼaja ndraʼo dozi sangila jaʼodo, labobo mbawara ba lafalichõ ira. (Job. 16, 4. 10).

9”Beʼe balazi Jehowa! Jamoeʼorifi ia, jamoeʼefaʼõ; iʼomasiʼõ sa atṍ ia.”

10Jaʼia, jaʼoegõ zanõbi jaʼodo mege moroi ba daloe ninagoe, ba lõ saboe dõdõgoe, ba mbalõ meme ninagoe, õbeʼe. (Sin. 71, 6).

11Jaʼoegõ dõtõnafõgoe, iʼotarai daloe ninagoe; iʼotarai ba gaheta ninagoe, ba Lowalangigoe ndraʼoegõ.

12Bõi arõoeʼõgõ chõgoe, me no ahatõ waʼatosasa, lõʼõ sa sangorifi.

13Oja zamasoei jaʼo õrõbao, lafaʼoeʼoe ndraʼo si matoea gõrõbao Mbazana andrõ.

14Lafaboka mbawara chõgoe, hoelõ si mane singo, si manga niha, si ndrõndrõndrõndrõ.

15No tefadoewa ndraʼo, hoelõ nidanõ, ba no ahori faefa mboeʼoegoe; no tobali hoelõ zigoesigoe dõdõgoe, no mangoeloe barõ dotogoe. (Loek. 22, 44).

16No okõli gararogoe, hoelõ doega lawoe, falemba lelagoe ba dõlõtõlõgoe ba õbaliʼõ obooela zi mate ndraʼodo. (Joh. 19, 28).

17Noa sa lafasoei ndraʼo asoe, lafaʼoeʼoe ndraʼo seboea horõ, no owoelo; no latõlaʼõ dangagoe awõ gahegoe. (Joh. 20, 25. 27).

18Oeʼila oeʼerai dõlagoe fefoe. Lafaigifaigi, latõngõtõngõ ndraʼo, faʼomasira.

19Lafaosa chõra noechagoe ba fadahõdahõ ba gamezagoe. (Joh. 19, 24).

20Ba jaʼoegõ, Jehowa, ba bõi arõoeʼõgõ! jaʼoegõ faʼabõlõgoe, taʼitaʼi tolodo!

21Efaʼõ ndraʼo ba mbawa ziʼõli andrõ, nosogoe, si ha samboesamboea andrõ, efaʼõ ba nasoe. (Sin. 35, 17).

22Fasõbido ba mbawa zingo! Noa sa õfondrondrongo ligoe, ba dandroe gõrõbao andrõ.

23II. Edõna oeʼombachaʼõ dõimõ ba dalifoesõgoe, ba hoenõ zowoelo niha oesoeno ndraʼoegõ. (Sin. 9, 15. Hebr. 2, 12. Joh. 20, 17).

24Jaʼami sangataʼoefi Jehowa, misoeno ia! Jaʼami, madooe Jakobo, mifosoemange ia, ba miʼataʼoefi ia, jaʼami maʼoewoe Gizeraëli fefoe.

25Tenga sa fa lõ ba dõdõnia wamakao zi gõna famakao andrõ ba lõ niʼogorofinia; ba me no mangarõngarõ chõnia, ba no ifondrondrongo. (Sin. 9, 13. Heb. 5, 7).

26Bõrõ ndraʼoegõ, wa manoenõ ndraʼo ba gowoeloa seboea; oeboeʼa nifaboeʼoegoe tánõ fõna zangataʼoefi jaʼia.

27Faloecha manga zi gõna famakao andrõ ba aboeso; lasoeno dania Jehowa sangaloei jaʼia; ja aoeri dõdõmi, si lõ aetoe! (Sin. 69, 23).

28Lasõndra tõdõra balõ danõ fefoe ba mangawoeli chõ Jehowa; ba fõnamõ latoehi danõ fefoe soi niha baero.

29Chõ Jehowa sa waʼasalaw̃a ba jaʼia zamatõrõ soi niha.

30Ha fõnania lalaoegõ tooe ira ba danõ dozi satabõ ba goeli danõ andre; fõnania lafaõndrõ ira dozi sanaw̃a tanõ andrõ tooe, ba ha niha si lõ mangila mangorifi nosonia. (F. 2, 10).

31Maʼoewoe daʼõ zi mõi enoninia dania. Ladoenõdoenõ Zoʼaja ba niha dania. (Jes. 53, 10).

32Laʼombachaʼõ waʼatoelõ dõdõnia ba niha si toemboe mitooe, wa no ifoloealoea. (Sin. 110, 3. Joh. 19, 30).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index