Furvlenn hwilans

Gaqkhoel 18

Paolluv Gaolliqthu meenq bhai jaol-u khe ganl

1A bhai nee ngal-aq neq, Paolluv Aqtheiq meenq nee dov ail khi, Gaolliqthu meenq bha ail-a nail ngaol. 2A bhai, Bhoqthul milkhaoq bhai jaol nail Aqgullav dai mil-ai thaq nail Yuldav nail tsaol-aq teevq gaq bhai thaoqphuq-a nail ngaol. Yuldav nail tsaol-aq iqsanl mail, Lolmav meenq nee ya dov ail naol dai, heeqphaq Gaqlaldil daoq bivq-a nail ngel-i mail, aivq nail khaqma Bhilgillav nee mail Iqtaqliq milkhaoq nee mail dov lee-a nail ngaol. Aq-u phao, Paolluv aqyu nvq maolyaq jaol nail bhai ail-a nail ngaol. 3Aqyu nvq maolyaq al bhai kev lee-a nail maq mao lal haq-al. Paolluv khi Aqgullav aqyu nvq maolyaq ganl teevq phaq taivq-ail nl nail ngel-i mail, Paolluv aqyu nvq maolyaq nee jaol-ail khi, aqyu nvq gaq nee mail ganl nl-a nail ngaol. Khul khi mail dai ngal-aq neq, aqyu juq neq, haqphal saiqgov guvq nail tsaol-aq ngaol. 4Jaol n yaoq jao yaoq-ao nee uqhuq thaoq nail ilkhaol lavqkhoel bhai Yuldav nail tsaol-aq khi Heiqlaqsal tsaol-aq Yeiqsul bhai neema thaqtsaol lal dai, Paolluv laijai laijai-ail cavq bhiq nail ngaol.

5Siqlav khi Tilmolseiq, Maqgeiqdaolnil milkhaoq nee Paolluv jaol nail bha kev lee-u phao, Paolluv neq, aivq khaq mao iqsanl nl nail ganl maq nl mail, Miqyail nail daoq taivq-ail cavq bhiq cov bhiq khi, Yeiqsul neq Khali ngaol dai, Yuldav nail tsaol-aq nail sivtavq bhai salkhil khanq nail ngaol. 6Aqyu juq aivq cavq nail cov nail bhai maq naldaiq dai, aivq bhai aqdoil ge-u phao, aivq phailkhaoq jiivq khal khi ge nail: “Nuljuq doevq nail phaq bhai sunq-ail haq neq, nuljuq nail oeqbal ngaol. Ngaq bhai khul teevq phaq iqsanl, maq tavq yaoq-aol. Yanqgaol nee ngal neq, yu nail jeq-e jaq-a bha ngal cavq bhiq cov bhiq ail naol” dai, ge bhiq-a nail ngaol.

7A bhai nee ngal-aq, aqyu juq jaol nail nee aivq dov ail khi, Tiltuv Yulthul dai mil-ai thaq nail Miqyail bhai uqhuq thaoq nail, yu nail jeq-e teevq gaq nail ilkhaol bhai jaol ail-a nail ngaol. Tsaol-aq al gaq nail ilkhaol neq, uqhuq thaoq nail ilkhaol nee ilkhaiq tavq nail ngaol. 8Gaqlilphul dai mil-ai thaq nail uqhuq thaoq nail ilkhaol bhai aqivq jiovq nail gaq, aivq nail miqsaol yovyaq iqsanl mail Yeiqsul bhai neema thaqtsaol nail ngaol. Gaolliqthu meenq bhai jaol nail tsaol-aq maodai, Miqyail nail daoq ya gaiq khi, neema thaqtsaol nail lavqkhoel nee ulcuvq saol-a nail ngaol.

9Teevq kivq neq, aqhaqlal lavqkhoel, Heeqphaq Yeiqsul Paolluv bhai ge bhiq lee-a nail: “Thaq geesil. Maq cavq maq cov-ail aqtsi tsu dai, thaq jaol. 10Ngal naoq-ai nee jaol naol. Yu naoq bhai lav thaoq lav nal lal nail phaq maq nl nia-ail. Khul khi mail dai ngal-aq neq, meenq niil meenq nail lavqkhoel bhai ngaq nail tsaol-aq maodai jaol nail ngaol” dai, ge bhiq-a nail ngaol. 11Alheel ngel-i mail, Paolluv Gaolliqthu meenq bhai teevq kovq ovqtavq, bhala kovq heeq jaol khi, Miqyail nail daoq cavq bhiq cov bhiq-a nail ngaol.

12A bhai nee ngal-aq, Gaqliqoq dai khul nail gaq, Aqgaqyal milkhaoq bhai uvthaiq-u phao, Yuldav nail tsaol-aq juq jil lai khi Paolluv bhai nieivq khi, yalkhaq dal duq bhai hel-aivq-a nail ngaol. 13Aqyu juq ge nail: “Tsaol-aq niil gaq neq, aoldaoq kovqdaoq bhai maq tsaq dai, yaoq phaq yaoq nail Miqyail bhai uqhuq thaoq nail haqbhoil, yu bhai jalmul mul thailthaiq nail ngaol” dai, ge nail ngaol.

14Paolluv daoq ge nail dai khi-u phao, Yuldav nail tsaol-aq al juq bhai Gaqliqoq niailhai ge bhiq-a nail ngaol: “Yuldav nail tsaol-aq juq-ol, ganl thoil ganl neq, haqeiv nail teevq phaq ganav nl bheeq-a nail, laiq nail tsa nail teevq phaq ganav nl thaq nail nul neq, nuljuq ge nail bhai ngal ol khi naldaiq bhiq kivq naol. 15Thailhai ngaol-aoq, daoq nail ganl, aqmil nail ganl khi, nuljuq nail aoldaoq kovqdaoq nail ganl nee jil pheeljaq nail teevq-eel ngel-i mail, nuljuq yovqgavq bhai yovqgavq nl gil yaoq. Ngal thoilheel nail ganl bhai yalkhaq dal nail tsaol-aq maq jiovq movq-ail” dai, ge bhiq-a nail ngaol. 16Alhai ge gaq-u phao, aqyu juq bhai yalkhaq dal nail ilkhaol lavqniil phao the dov bhiq-a nail ngaol. 17Aq-u phao, tsaol-aq munl munl ma ga jil khi uqhuq thaoq nail ilkhaol bhai aqivq jiovq nail Solthai bhai nieivq khi, yalkhaq dal nail ilkhaol nail sivtavq nee deeq-a nail ngaol. Thailhai ngaol-aoq, Gaqliqoq neq, ganl al aivq bhai khul maq tavq nail khe-ai, jaol nail ngaol.

Aqdil-aoq meenq bhai kovq ail-a nail ganl

18Paolluv neq, Gaolliqthu meenq bhai jaol nail aqivq jaqbheq Khali yaq juq nee mail mee nia n jaol-a nail ngaol. A bhai nee ngal-aq, aqyu juq nee gaoq ail khi, Bhilgillav khi Aqgullav aqyu nvq maolyaq nee mail teevq gaq khe-ai, laovq jeeq khi, Sulliv milkhaoq bhai ail kev-a nail ngaol. Geiqjeiq meenq bhai ail kev-u phao, aivq daoqma saljial ge-ai thaq nail khe-ai, uqhuq tsailkheel he ha-a nail ngaol. 19Aqyu juq Eilpheilsu meenq bha ail kev khi, Bhilgillav khi Aqgullav aqyu nvq maolyaq bhai a bhai bhi jaol ail ceevq-a nail ngaol. Paolluv neq, uqhuq thaoq nail ilkhaol bhai aol lai khi, Yuldav nail tsaol-aq juq nee mail ge tsaoq pheeljaq-a nail ngaol. 20Niai teevq yanq dai jaol nail haqbhoil yu aivq bhai hal khi ngaol-aoq, aivq maq jaol-al. 21Aivq dov ail-u phao, “Miqyail neema tsaq haq neq, nuljuq jaol nail bha ngal teevq pov gaoq lal kev naol” dai, ge-ail ceevq khi, Eilpheilsu meenq nee laovq jeeq khi, dov ail-a nail ngaol. 22Gailsaqlil meenq bhai ail kev-u phao, Yeiqlulsaqlaiq meenq bha lai khi, Khali yaq munl bhai daoq tsaoq phuq-ail ceevq khi, Aqdil-aoq meenq bhai kovq ail-a nail ngaol.

23A bhai teevq yanq jaol thaq-al nee ngal-aq neq, Gaqlaqtil milkhaoq khi Phulgil milkhaoq bhai tsao tsail laivq khi aqivq jaqbheq Khali yaq juq iqsanl bhai gaq bivq lai-a nail ngaol.

Eilpheilsu meenq bhai Aqpaolluv-i mail cavq bhiq cov bhiq-a nail ganl

24Aq-u phao, Aqleiqsaqdul meenq bhai doevq lee-a nail Aqpaolluv dai mil-ai thaq nail Yuldav nail tsaol-aq teevq gaq, Eilpheilsu meenq bha lee-a nail ngaol. Aivq neq, daoq mailma-ail ge nia khi, Jalliq aqmeeq-ai heeq nia nail tsaol-aq teevq gaq pevq nail ngaol. 25Aivq neq, Miqyail nail ganl ya saol daiq khi, neema kev deedee nail lavqkhoel nee, Yeiqsul nail ganl teevq peivq iqsanl maq lav laiq dai, cavq bhiq cov bhiq nia nail ngaol. Thailhai ngaol-aoq, ulcuvq saol nail ganl bhai tavq lai khi, Yaolhaq nail ulcuvq saol nail ganl taivq-ail, aivq heeq nia nail ngaol. 26Aivq neq, uqhuq thaoq nail ilkhaol lavqkhoel bhai maq geesil dai, iqmoeq ilmoeq cavq bhiq cov bhiq-a nail ngaol. Bhilgillav khi Aqgullav aqyu nvq maolyaq neq, aivq-i mail cavq bhiq cov bhiq nail daoq bhai ya gaiq-u phao, aivq bhai ilkhaol bha hevq kol lavq khi, Miqyail nail ganl daolcoev dai, aqmeeq-ai gaoq cavq gaoq cov laoq bhiq-a nail ngaol.

27A bhai nee ngal-aq, Aqgaqyal milkhaoq bha ail nail haqbhoil Aqpaolluv noeqceiv-a nail ngaol. Alheel ngel-i mail, Aqgaqyal milkhaoq bhai jaol nail aqivq jaqbheq Khali yaq juq, aivq bhai hav dai, Eilpheilsu meenq bhai jaol nail aqivq jaqbheq Khali yaq juq-i mail aivq bhai gaq bivq khi haoqgavq gevq bhoel bhiq-a nail ngaol. Aivq a bhai ail kev-u phao, Miqyail nail geeqlaoq eeljaol bhaqda nee neema thaqtsaol nail tsaol-aq pevq lal thailthaiq nail juq nail haqbhoil, tsaojao-ai nia deedee nail ngaol. 28Khul khi mail dai ngal-aq neq, milkhaoq yaq nail sivtavq bhai, aivq Jalliq bhai juq juq-ail khi Yuldav nail tsaol-aq nee mail, mailma-ail jil-u phao, Yeiqsul neq, Khali pevq nail ganl bhai, ge gaq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index